Həmin qamət, həmin duruş.
Həmin həsrət, həmin baxış,
Saçın bəyaz, üzün qırış
Səni hardan tanıyıram?
Gedən gedib,qalan qalıb.
Zaman keçib. Vaxt azalıb,
Salam verib, salam alıb
Səni hardan tanıyıram?
Demədim ki ayaq saxla.
Dön gəl boynumu qucaqla,
Nə baxırsan qaş qabaqla?
Səni hardan tanıyıram?
Kim yubandı?, kim tələsdi?
Qarşımızı nələr kəsdi?
Səsin elə həmin səsdi,
Səni hardan tanıyıram?
Bir könüldə iki candıq,
Tufan qopdu, aralandıq.
Nə itirdik?, nə qazandıq?
Səni hardan tanıyıram?
İndi görüş bizə haram.
Səntək mən də. günahkaram.
Köz bağlayıb daha yaram.
Səni hardan tanıyıram?
Həmin qamət, həmin duruş,
Həmin həsrət.həmin baxış,
Saçın bəyaz, üzün qırış
Səni hardan tanıyıram?
24.09.1994 Müəllif Gövhər Əntiqə